„ Инвестираме преку 330 милиони евра во изградба и рехабилитација на патната мрежа во Источниот регион, рехабилитираме преку 30 регионални и магистрални патишта и градиме преку 90 километри експресни патишта“, истакна министерот за транспорт и врски, Горан Сугарески при денешниот увид во рехабилитација на обиколницата на Кочани.

Проектот за рехабилитација на обиколницата на Кочани е во вредност од 1,67 милиони евра, а се очекува да се заврши до крајот на месец октомври.

Во изјава за медиумите, министерот за транспорт и врски, Горан Сугарески истакна дека градежните работи се одвиваат со силно темпо и речиси целата патна мрежа во Источниот регион е веќе рехабилитирана.

„Покрај рехабилитацијата на обиколницата на Кочани, како дел од Коридор 8 го завршивме автопатот Миладиновци-Штип, во завршна фаза е изградбата на експресниот пат Штип-Крупиште, а започнавме и со изградба на втората фаза од експресниот пат, делницата Крупиште-Кочани. Исто така го унапредивме пристапот кон граничните премини кон Бугарија. Регионалните патни правци во делот на Берово и Делчево се веќе рехабилитирани, а завршивме и со реконструкциите на патните правци кај Пробиштип и Злетово. Покрај рехабилитацијата на регионалниот пат Берово – Виница, значајно за развој на туризмот во овој регион е што го рехабилитиравме патот кон Пониква, така што, морам да нагласам дека имаме една силна активност и се залагаме за развој на овој регион, зашто сите знаеме колку долго беше заборавен“ - изјави министерот за транспорт и врски Горан Сугарески.

Министерот Сугарески додаде дека заложбите за унапредување на патната инфраструктура ќе продолжат и во наредниот период, а Владата ќе остане посветена на создавање услови за економски развој и конкурентност на секој од регионите, поквалитетен живот на граѓаните, брз и безбеден транспорт и подобро регионално поврзување.

Директорот на ЈП за државни патишта, Зоран Китанов истакна дека обиколницата на Кочани е доста значајна за овој дел на државата, затоа што продолжува кон граничниот премин со Бугарија.

„Обиколницата со должина од 6 километри и ширина од 7 метри, ќе биде комплетно рехабилитирана до крајот на следниот месец. Со завршувањето на рехабилитацијата на патните правци во Малешевијата, слободно можам да кажам дека нема регионален пат во Источниот регион кој не е рехабилитиран. Продолжуваме и понатаму со унапредување на патната инфраструктура во државата. Дел од рехабилитациите завршуваат во текот на овој и следниот месец,  а ЈП за државни патишта веќе отпочна со нови јавни повици, од кои 7 завршија изминатата недела, а во следниве десет дена ќе бидат објавени уште 8 нови тендери. Уште еднаш ќе истакнам, ова е прв пат да се рехабилитира 550 километри патна мрежа за само една година.“ – изјави директорот на ЈП за државни патишта Зоран Китанов.

Според градоначалникот на општина Кочани, Николчо Илијев, рехабилитацијата на обиколницата, покрај автопатот Миладиновци – Штип и експресниот пат кој се гради од Штип до Кочани, ќе придонесе за економски развој на регионот и за подобрување на животот на граѓаните.

Градоначалникот Илијев додаде и дека со реконструкцијата на патниот правец Кочани-Пониква се создале можности за развој на туризмот и истакна дека имаат најави за неколку сериозни инвестиции во изградба на хотели и угостителски објекти.