Министерот за транспорт и врски Горан Сугарески оствари работна средба со Амбасадорот на Руската Федерација во Република Северна Македонија, Сергеј Баздникин.

На средбата се разговараше за капиталните проекти кои во моментов се реализираат во Република Северна Македонија, како и планираните инвестиции во изградба на инфраструктурата во државата што ќе се реализираат во периодот што следува.

„Оваа средба беше одлична можност да го запознаам Амбасадорот со крупните капитални проекти кои ги реализираме во нашата држава. Посебен фокус ставивме на изградбата и модернизацијата на патната мрежа на Коридор 8 и 10, процесот на гасификација на државата, како и железничкото поврзување кон Бугарија. Изградбата на железницата долж Коридорот 8 кон соседна Бугарија е од особено значење за зголемување на економската соработка со Русија, затоа што тоа овозможува железничка поврзаност и со оваа земја“ – изјави министерот за транспорт и врски, Горан Сугарески.

Во текот на средбата, исто така се разговараше и за можноста за зголемување на квотите за транспортни дозволи, како и за можноста за воспоставување на директна авиолинија помеѓу нашата земја и Руската Федерација.

„За потребите на македонските превозници, нашата држава е заинтересирана за зголемување на квотата на дозволи за билатерален и транзитен превоз на стока, како и на дозволите за и од трета земја, со што би се интензивирала економската соработка“ – истакна министерот Сугарески.

Министерот Горан Сугарески нагласи дека нашата држава се наоѓа во силен инвестициски циклус кој ќе продолжи и во текот на следната година и ги покани руските заинтересирани компании да се пријават на јавните повици.

На средбата министерот се заблагодари за досегашната соработка со Руската Федерација и ја нагласи потребата од одржување и продлабочување на долгогодишното пријателство.

Во таа насока, на 14-ти и 15-ти ноември во Охрид, ќе се одржи Седница на Македонско-Руската комисија за трговско-економска и научно-техничка соработка, како и Бизнис Форум на кои би се разговарало за унапредување на сите видови транспорт и создавање на услови за зголемена економска размена меѓу двете земји.