Министерот за транспорт и врски, Благој Бочварски, придружуван од заменик министерот Реџепи, денеска оствари работна средба со холандскиот амбасадор во земјава, Н.Е. Дирк Јан Коп.

Силната поддршка што ја добива Република Северна Македонија од Кралството Холандија на својот европски пат е од големо значење.

Тие на средбата разговараа за реализацијата на капиталните проекти во земјата, а кои придонесуваат за ефикасно регионално поврзување.

„Односите помеѓу Република Северна Македонија и Кралството Холандија се на високо ниво и нашата меѓусебна соработка продолжува интензивно и во периодот кој претстои. Работиме активно и напорно со цел модернизација на нашата инфраструктура и интеграција во европскиот транспортен систем. Регионалното поврзување и европската интеграција се наш врвен приоритет и правиме крупни чекори во таа насока.“ – изјави министерот Бочварски.

Тој истакна дека заеднички со поддршка од европските партнери ќе ги надминеме предизвиците пред кои сме исправени.