Министерството за транспорт и врски продолжува активно и во континуитет да дава поддршка на општините преку проекти со кои ја подобруваме и развиваме патната мрежа и ја подигнуваме безбедноста при патувањето.

Со Проектот за рехабилитација на локални улици и патишта вбризгуваме неповратни средства во локалните самоуправи со што значително го подобруваме урбаното живеење. До сега реконструиравме преку 90 локални улици и патишта во 46 општини.

Министерот за транспорт и врски, Бочварски, денеска оствари работна посета на општина Валандово каде со градоначалникот Костадинов поразговараа за проектите кои се реализираат со поддршка од централната власт, а го означија и почетокот на градежните активности за рехабилитација на локалниот пат Јосифово – Калково.

„Министерството за транспорт и врски дава силна поддршка на општините. Во општина Валандово вложуваме скоро 700 илјади евра преку Проектот за рехабилитација на локални улици и патишта. Денеска започнуваме со рехабилитацијата на локалниот пат кој ги поврзува населените места Јосифово и Калково, чија инвестиција изнесува 8,7 милиони денари и со што решаваме големо прашање за локалното население.“ – изјави министерот Бочварски.

Тој ја искористи приликата да најави уште еден проект кој ќе започне да се реализира наскоро во општина Валандово со поддршка од централната власт.

„Оваа есен очекувам да започнеме со реализација на проектот за изградба на примарна водоводна мрежа во населеното место Калково. Документацијата е подготвена, наскоро ќе биде распишан јавниот повик за избор на фирма изведувач. Со општина Валандово и градоначалникот Костадинов имаме одлична соработка и продолжуваме така и понатаму со цел обезбедување подобри услови за живот на граѓаните и развој на локалната економија.“ – истакна министерот за транспорт и врски, Благој Бочварски.

Градоначалникот на општина Валандово, Перо Костадинов, се заблагодари на досегашната поддршка од централната власт и најави реализација на нови проекти во наредниот период.

„Особено ми е драго што денеска заедно со министерот Бочварски сме во Јосифово, каде со поддршка од Министерството за транспорт и врски започнува рехабилитацијата на локалниот пат кон н.м. Калково. Реализацијата на квалитетни проекти кои носат бенефит за нашите граѓани се наш приоритет. Би сакал од мое име и од името на жителите на општина Валандово да се заблагодарам за досегашната поддршка од централната власт и уверувам дека добрата комуникација и соработка ќе продолжи и во иднина, со цел подобрување на квалитетот на живот и поттикување на забрзан развој на општина Валандово.“ – изјави градоначалникот Костадинов.